روايه كامله بقلم عمرو راشد

بيت العيلة من اكتر الحاجات اللي ممكن تسبب مشاكل في حياتنا بس كنت دايما فاكرة اني لما هخرج منه هتنتهي المشاكل دي ولكن انا مكنتش اعرف ان اللي فات دا كله كان تمهيد للي هيحصل قدام
بذمتك مش كان احسن انك تتجوزي أنتي وبودي بدل الراجل الغريب اللي انتي جايباه دا
مروان مش هيكون راجل غريب يا خالتو.. دا هيكون جوزي وبعدها هيكون واحد من العيلة و بعدين انا و بودي اخوات مش اكتر من كدا
اخوات اه.. بس على الاقل كان مضمون.. بكرا تشوفي مروان دا هيعمل فيكي ايه
انا مش عارفة ليه انتي مش بتحبيه
وانا احبه ليه يا حبيبتي هو انا اللي هتجوزه

بس يعني حاولي تتقبليه شوية
حاولت والله ومش عارفة.. اول ما بشوفه بتعصب وبعدين تحسيه عيل ملزق كدا و مش مظبوط
ضحكت ورديت عليها
قصدك يعني عشان بيدلعني
ايه نودي دي.. دمه سم وهو بيقولها
لعلمك بقا دي اكتر حاجة بتحببني فيه.. بحس انه حنين عليا أوي
امممم حنين اه.. اشبعي بيه يا حبيبتي
بقولك ايه يا خالتي.. طبعا انتي عارفة انا بحبك قد ايه ويمكن أكتر من امي والله ف عشان خاطري حاولي تقبليه عشاني انا حتى
حاضر يا حبيبتي
من ساعة ما فتحت عيني على الدنيا وانا مش شايفة غير خالتي صفاء.. تقريبا انا عيشت و اتربيت عندها.. كنت باكل واشرب وأنام كمان وطبعا انا مكنتش لوحدي كان معايا بودي ابن خالتي و دا اللي انا قضيت معاه حياتي كلها لحد ما دخلت الجامعة و اتخرجت كمان..
خلاص هتتجوزي وتسبيني يا هند
يا بودي هو انا هسافر يعني.. مانا هبقا موجودة برضو يعني تقدر تيجي عندي في اي وقت
وجوزك هيوافق على اللي أنتي بتقوليه دا
وهو مروان ميوافقش ليه 
انا حاسه مش بيطيقني
حرام عليك متقولش كدا انت بس عشان متعرفوش كويس
لا عارفه وعارف هو عايز ايه
يعني هيكون عايز ايه
عايز ياخدك مننا ويبعدك عن اهلك وصحابك
مروان لو كان عايز يعمل كدا مكنش وافق اننا ناخد شقة جنبكو هنا عشان مبقاش بعيدة عن امي و بعدين سيبك بقا من مروان خالص وخلينا فيك انت.. عملت ايه مع شهد
عادي ولا حاجة
ولا حاجة ازاي ياابني.. مش دي البت اللي كنت ھتموت وتكلمها ويوم ما تكلمها تعاملها بالشكل دا
عملت فيها ايه يعني
حرام عليك يا بودي البت مكلماني وهي بټعيط
وهي المفروض كدا تصعب عليا مثلا يعني
لا بس لو مش عايزها قولها
قولتلها كتير وهي مش عايزة تفهم
يبقا بتحبك يا بودي
انا مش حاسس معاها بأي حاجة
انا احترت معاك والله.. كل ما اجبلك واحدة و اعرفك عليها متكملش يومين وتسيبها
عشان مش شايفهم.. انا مش عارف احس معاهم بحاجة
على كدا بقا انت عايز واحدة تفصيل على مزاجك
بالعكس اللي انا عايزها موجودة وشايفاني بس شايفاني في حدود معينة مش عايزة تشوفني برا الحدود دي
و دي مين دي بقا اللي انا معرفهاش
سيبك مني دلوقتي و قوليلي أنتي حجزتي مع الكوافير ولا لسة
لا لسة والله.. عايزة اشوف حد كويس الاول
خلاص سيبي الموضوع دا عليا.. وبعدين انا شايف بشرتك مرهقة اوي حاولي تهتمي شوية.. انا عايزك تبقي اجمل عروسة في الكون كله
جميل أوي انك تلاقي حد تتكلم معاه.. حد يشجعك ويدعمك ويحاول يساعدك بأي طريقة.. و دا كله انا لقيته في بودي بعدها رجعت بيتي و دخلت أوضتي وبفتح تليفوني بالصدفة لقيت
مروان اتصل بيا أكتر من مرة وانا مشوفتش.. اتصلت انا بيه
ايه يا حبيبي
انتي كنتي فين
كنت عند خالتو.. معلش والله مشوفتش التليفون خالص
وبتعملي ايه عند خالتو
قاعدة معاها عادي
طبعا بودي كان هناك
اه هناك اومال هيروح فين يعني
هو انا مش قولتلك متروحيش هناك طول ما الواد دا موجود
ماهو انا مش فاهمة ليه
كدا انا مش بطيقه دا كفاية اسمه هو في حد اسمه بودي
يابني اسمه عبدالله بس احنا بنحب ندلعه
طيب يا هند ياريت لو سمحتي متروحيش هناك وهو موجود تاني.. لما يكون مش موجود روحي براحتك
انا مش فاهمة في ايه بجد
في اني بغير عليكي يا هند ومبحبكيش تقعدي مع الواد دا كتير
يا حبيبي دا زي اخويا
انا مفهمش الكلام دا ومن اول يوم قولتلك انا مش هقبل بالكلام دا.. كلمة دا اخويا واحنا متربيين مع بعض كل دا ميدخلش عليا
خلاص حاضر.. انا هعملك اللي انت عايزه بس اهدا
دي كانت أكتر مشكلة انا بقابلها لان بالشكل دا انا و بودي مش هنعرف نتكلم بعد الجواز.. واساسا مبقاش فاضل كتير لان الفرح كمان أسبوع بالظبط ف مكنش ينفع ان اي خناقة تحصل دلوقتي بيني وبين مروان.. حاولت أراضيه بكلمتين وبعدها خرجت قعدت مع ماما شوية
مالك
مش عارفة يا ماما.. عندي شعور غريب
شعور غريب ازاي يعني
خاېفة وقلقانة.. حاسة بتوتر حاسة ان في حاجة مش مظبوطة.. مش عارفة
يا حبيبتي كل دا طبيعي وبيحصل لأي عروسة.. لازم يكون في شوية توتر وخوف كدا لان برضو حياه المتجوزين مش سهلة
مش سهلة ازاي
يا هند انتي هتكوني مسؤولة