صرخه ابليس
تشوفه متديلوش أكتر من 60 سنة بس لما تبتدي تتكلم معاه هتحس فعلا انه مش إنسان عادي دا واحد عابر للزمن .. بالإضافة لإنه معاه مستندات ووثائق تثبت عمره الحقيقي وتثبت كمان اسمه الحقيقي اللي بالمناسبة مش نوح خالص لكن الناس أطلقت عليه اسم نوح بسبب حكاية سنه الكبير دي ..
بعيدا عن كل الأساطير اللي بتتردد حوالين الشيخ نوح خلينا نكمل حكايتنا ..
بيت قديم متهالك لما تشوفه من برا هتحس انه موجود هنا فعلا من 300 سنة ..
وهيزيد إحساس الرهبة جواك لما تدخل البيت من أول باب البيت الخشب القديم جدا اللي اتفتح لوحده بمجرد ما طارق وابوه وقفوا قدامه أنا عارف ان دي مبقتش معجزة دلوقتي وأي مول فيه باب بسينسور بيفتح أول ما تقرب منه ..
في بيت الشيخ نوح هتحس بالزحمة رغم إنه عايش لوحده طارق وابوه مشافوش أي مخلوق في البيت مع الشيخ لكن فيه ناس كتير بتخدمه فيه حد فتح الباب وفيه حد كان بينضف البيت وفيه حد تالت دخل للشيخ المنقد والفحم والبخور بس طارق وابوه مشافهوش ..
الحاج رمضان كان مستعجب الشيخ عرف اسمه منين .. لكن الشيخ فاجأه بسؤال تاني قبل ما يفوق من حيرته وقاله ليه سيبت طارق لحد دلوقتي يا رمضان جايلي بعد ما سمع الواد ضاع
دا بالظبط كل حرف قاله بينه وبين نفسه الشيخ نوح ازاي عرف كل الكلام دا
للمرة التالتة في نفس الدقيقة تقريبا يفاجأه الشيخ نوح بإنه عارف كل حاجة بتدور جوا عقله وقاله متستغربش كدا يا رمضان .. أنا كنت سبب من الأسباب اللي ربنا سخرها لوجودك في الكون ..
الشيخ نوح قاله انت مش ابوك مرزوق ابن سالم ابن عبد الكريم ابن حمدان ابن مخلوف مش مخلوف دا كان متجوز ست اسمها نور العيون بنت حمزة وقعدت 20 سنة بعد جوازها متخلفش كان معمولها سحر ومدفون في بطن سمكة والسمكة كان في البحر أنا اللي اصطدت السمكة دي من نص البحر وطلعت العمل من بطنها وكنت سبب ان جدك وجدتك يخلفوا .. لسه بتسأل نفسك الشيخ نوح عمره كام سنة
وضحك الشيخ نوح ضحكة عالية هزت حتى جدران البيت وزرعت الړعب أكتر وأكتر في قلب الحاج رمضان ..
كمل الشيخ نوح كلامه وقاله 300 سنة دا خيال الغلابة الشيخ نوح عمره 500سنة ولسه هيعيش 500 سنة قدهم ..
توقيتي غير توقيتكم وحسابات زمني غير حسابات زمنكم .. لأن انا مش إنسان زيكم ..
وبعدين وجه كلامه للطفل وقاله تعالى يا طارق اقعد هنا
